أصول التعارف وأهم نقاط فن الاتيكيت مع خبيرة الاتيكيت “رحاب المحمدي”

كتبت / نجاح سالم

“رصــــد الـــوطــن”

دايما فيه اسئلة كتيره جدا فى فن اصول التعارف وفي اهتمامات خاصة جدا من قبل البعض

كلنا بنتقابل مع ناس كتير منعرفهاش بنبقى عايزين نعرف التفاصيل الخاصة والاخطاء اللى ممكن نقع فيها واحنا بنعرف نفسنا للاخرين او الاخرين الى احنا بنعرفهم لما بيعرفونا للناس الغرب .

ازاى الزوجة تعرف زوجها للناس والعكس ازاى الزوج يعرف زوجته للاخرين بدون احراج هنعرف اجابات الاسئله وأكثر مع خبيرة الاتيكيت / رحاب المحمدي

الانطباع الاول :

فن الإتيكيت : هو فن التعامل لان أوقات قصة التعارف بتبوظ مواقف وحاجات كتير ومقابلات عمل .

فعلا زى مالتعارف بيبوظ علاقات او انترفيو فهو بيدى صورة كويسة عنك او مايسمى بانطباع ناجح واللي هو من اساسيات التعارف ومن اهم موضوعات فن الاتيكيت

وزى مابنقول دايما “الانطباع الاول بيدوم ” هو فعلا بيدوم او بيختفى او بيتغير فى اول 10 ثوانى فى التعارف الاول

ودايما لازم نكون عارفين ان قبل مايكون فيه تعارف لفظى بتيجى الابتسامة او المظهر وتدينا الانطباع الاول عن الشخص .

قد ايه مهم لما نكون بنتعرف على حد لاول مرة مش بس نكون مبتسمين دا إحنا بنطلع ابتسامة حقيقية لان الشخص اللى قدامك ذكى فى انه يفهم الابتسامة دى مصطنعة ولا حقيقة لطيفة ولا فيها نوع من الخباثة .

وكمان المظهر واللي هو مهم جدا فى اساسيات التعارف لانه ضرورى جدا يكون المظهر مهندم ونظيف،ممكن نتعرف علي حد من نظافته الشخصيه

طيب هل الناس فعلا بتبص لبعض بمعنى انك تلاقى الشخص الى بيتعرف عليك بيجيبك من فوق لتحت

الحقيقة اه

ايوة كل الناس بتجيب بعض من فوق لتحت لان الانطباع عن المظهر والابتسامة طريقة الجلوس او الوقوف وبدون ما نشعر بيسود مابينا

شخصيا لو فكرت تتعرف على حد واول مابتشوفه بتلاقى عينك بتجيب تفاصيل ف شكله او مظهره ومش ضرورى تكون فاكر لابس ايه قد ما بتكون فاكر ان الشخص كان مهندم وريحته طيبة، طريقة طرحة السيدة مثلا منظمة طريقة جلوس الرجل مهندمة. .

يعنى الانطباع الاول ده مهم جدا لانه بيدوم او بيتغير بعد 10 ثوانى من اللقاء زى ما ذكرنا من قبل او من اول بداية الحديث لان ممكن مجرد ما الشخص الى قدامك يتكلم كل الانطباع الى اخدته فى الثوانى الى فاتت يتغير

بمعنى ان ممكن يكون الشخص شكله مهندم وكله تمام ولكن مجرد انه يتكلم نلاقى ان كل الجمال الخارجى ده يتمحى او ينهار والعكس كمان.

أن ممكن يكون الانسان الى بتتعرف عليه مش مهندم كفاية ولكن بمجرد بداية الحديث انطباعك عن عدم الاهتمام بالمظهر ده يتغير لان الشخصية اتكلمت واكتشفت انها كويسة وارتحت لكلامها واحترمته جدا

الخطوة التانية هى بداية التعارف بالكلام التعارف نفسه

هل انا اعرف نفسى الاول او اساله حضرتك مين هل فى اسئلة ممكن تبعد اللى قدامى عنى ؟

أكيد طبعا

هو من ناحية الاتيكيت فهو فى نوعين من التعارف

إما فى شخص مشترك مابينا بيعرفنا على بعض سواء فى حفلة فى مؤتمر او مكان عمل

هنا الاولوية فى التعارف بيكون للشخص المشترك ما بينا

وطبعا بتكون البداية للتعارف بتبدا من المراة أو للأكبر سنا او الأكبر مقاما او الأكبر فى التدرج الوظيفى

ولازم يذكر الإسم كامل والوظيفة أو المسمى الوظيفى ولكن لا يذكر أى تعليق شخصى على الشخصية اللي بتتعرف عنها.

بمعنى انك تعرف الشخص بأنه الأقرب الى القلب وأنه وأنه ثم تذكر إسمه لأن ده ممكن يؤثر على باقى الأفراد اللى بتتعرف عنهم وأكيد ده بياخد وقت بأنك تتعرف عن كل واحد وبتعليقك الشخصى عنه .

وبعد ما بتعرف الناس على بعض بتديهم مساحة حرية أنهم يتعرفوا على بعض.

إما إذا إتنين قعدوا مع بعض فى مكان وحاولوا يتعرفوا

ومن الخطا الشائع أنى اقول للشحص عرفنى عن نفسك أو أقول قوليلى بقى إسمك ايه بتشتغلى ايه

لا المفروض أن كل المعلومات الى عايزة أعرفها اقولها عشان أعرفها بمعنى

انى لو دخلت مكان وحبيت أتعرف على الناس الموجودة وبدأت أسلم فبعرف نفسى

أقول انا مين وبشتغل إيه وممكن خلال الكلام أقول انا ساكن فى المكان المعين فأكيد بلاقى الرد من نفس نوع الكلام .

كمان أن أى سؤال مش حابين نتساله منسالوش أو أى معلومات مش حابين نتكلم فيها منتكلمش فيها

مافيش داعى نتكلم فى التفاصيل الدقيقة منعا للإحراج من ناحيتنا أو للشخص الأخر لأنه لسة ده مجرد تعارف اول .

بالنسبة للتعارف بين السيدات أو بين الرجال

الرجال لو تعرفوا على بعض بعد معرفة الإسم والوظيفة يبدأ أطراف الحديث فى الوظيفة أو فى الحياة العامة وطول مانا بشوف أن الطرف الأخر بيتجاذب معايا فى أطراف الحديث فأتكلم لكن لو شفت أن الشخص غير متجاوب معايا أتوقف عن الكلام تدريجيا لعد إحراج الشخص .

مهم جدا فى التعارف فى البداية خصوصا أن كلامنا مايبقاش مقتضب لا يكون موزون مفتحش مواضيع لمجرد إنى قاعد فى عيادة دكتور مثلا ومستنى الساعة عشان أدخل للدكتور فأفتح مواضيع مش بتهم اللى قدامى هو المفروض أساسا ميعرفنيش ف هنا أتعرف عليه بطريقة جذابة وليس بأى موضوع .

ينصح فى بداية التعارف بأننا منكونش على طبيعتنا أوى لأن الناس الى لسة بنتعرف عليها هى مش من عيلتنا أو قرايبنا إحنا لسة بنحاول ندي إنطباع عن نفسنا سليم أو أحسن من انطباع قرايبنا عنا .

التواصل بالعين eye contact

طبعا من المهم أن يكون العين فى العين لأن التواصل ده من أهم أطراف التعارف مع الناس لأن عدم النظر للطرف الأخر ممكن يدى إنطباع سئ أو إنطباع بالإستخفاف وعدم الإهتمام أو عدم الثقة بالنفس .

السلام باليد :

المهم التعارف بين الرجل والمرآة أن لأ يبدأ الرجل أبدآ بالسلام باليد للمرآة لان من حق السيدة أنها لا تسلم باليد فتسيب حرية التصرف لها بأنها تسلم باليد على الرجل أو لا . لكن كل ماعليك انك تبدأ بالسلام القولى والمرآة لو عايزة تسلم حتمد إيدها ولو محبتش تسلم مش حتمد إيدها وده مش تقليل منك شخصيا أو أنها لا تريد السلام عليك لا هو مجرد حرية شخصية .

ولكن فى حالة أن الرجل مد إيده للسلام على المرآة انها ترد السلام لعدم الإحراج .

الثقة بالنفس :

من أهم النقاط فى التعارف الأول أن يكون فيه ثقة بالنفس فى السلام وفى الكلام عن نفسك أو عن وظيفتك وشغلك لأن ده بيجذب الشخص اللي قدامك ليك وأنه يهتم يسمعك ويتبادل معك الحديث.