الرقاق الطرى بنكهة القشطة والزبدة مقدم من شيف هدير علام

صينيه الرقاق الطرى مقدمة من شيف / هدير علام

بتحبوا الرقاق مورق مقرمش من بره وطرى من جوه وفى نفس الوقت تمسكوه يبقى قطعه واحده مش مفرفت .. يبقى تجربوا الطريقه دى ولا اسهل ولا اسرع والنتيجه مضمونه أن شاء الله

المقادير :

لعمل صينيه متوسطه

6ورقات رقاق طرى

نص ك لحمه مفرومه معصجه

نص كوب زبده سايحه او سمنه

كوب الا ربع حليب دافى

كوب الاربع شوربه دافيه

معلقتين قشطه بلدى أو وش اللبن

الطريقة :

نجيب الصينيه نديها تلميعه زبده حلوه ونرص 3 ورقات فوق بعض من الرقاق بدون اى تلميع بينهم نرصهم بس ونعمل حواف للصينيه .. بعد كده نحط اللحمه المعصجه ونرص التلات ورقات الباقيين واحده واحده برده بدون تلميعهم زبده نقفل أطراف الصينيه لجوه كويس ونقطع الرقاق ونجيب الزبده السايحه “نص كوب” نصبها على الصينيه كلها ونوزعها حلو ونجيب الحليب والشوربة الدافيين ولازم يكونوا دافيين نسقى الرقاق كويس بيهم وع الوش نوزع معلقتين القشطه .. نسيبهم خمس دقائق على منشغل الفرن على 200 ويسخن كويس ندخل بقى لحد مايستوى وياخد لون حلو من فوق وتحت نطفى نطلع يبرد شويه بدون تغطيه ونقطع ونقدم وبالهنا والشفا احلى رقاق فى الدنيا متماسك ومورررق واظن بدون مجهود

وعد الطريقه دى للى سنه اولى طبخ هيعتمدوها ويبقى اسهل حاجه عندهم صينيه الرقاق الجميله دى

والقشطه اللى ع الوش هتدى ريحه وطعم جااااامد