الريزووو بطعم مميز مقدم من شيف / هدير علام
الريزووو 🍚 مقدم من شيف / هدير علام
جربوه بطريقتى هيعجبكوا جدااا ووعد مش هتفرقوه عن بتاع عمو كنتاكى 😅 ولو اول مره تشوفوا الطريقه دى سجلوها بقى براءه اختراع ليا 😅
يلاااا بينا
3كوبايات رز مصرى
3كوبايات ميه
بصله متوسطه متخرطه ” مش مبشوره لااا متخرطه”
اربع فصوص توم مفرومين
معلقتين كبار كاتشب . تلات معالق كبار صوص باربيكيو .. معلقتين كبار صويا صوص
3 مكعبات مرقه دجاج ” مش هنحط ملح خالص”
تلات معالق كبار ” معلقه اكل” زيت نباتى
نص معلقه صغيره فلفل اسود ” لو عاوزينه سبايسى زودو الفلفل سيكا
وبس كده نيجى للتطبيق
فى حله ع النار هنحط الميه واول ما تغلى ننزل بالبصل والتوم والفلفل الأسود ومرقه الدجاج ونغطى الحله ونسيبهم يغلوا سوا خمس دقائق بالظبط نفتح ونزود الكاتشب والصويا والباربيكيو والزيت ونديهم غلوه كمان خمس دقائق ونحط الرز المغسول ومتصفى نقلب كويس ونوسطن النار خمس دقائق وقبل مايتشرب نهدى النار خالص وأما يتشرب لو عندكوا شياطه ارفعوا عليها الحله وسبوه بقى يستوى ويفلفل ويبقى زى الفل
بجد طعم خطيررررر وعن نفسى مفرقتوش عن ريزو كنتاكى جربوه بقى وقولولى
وطبعا التقديم زى مانحب انا قدمته زى كنتاكى مع قطع الفراخ المقرمشه وصوص الباربيكيو والتشيلى صوص
اترك تعليقا