الرئيسية أخبار العيش الفينو القطني البيتي أفضل من الأفران

العيش الفينو القطني البيتي أفضل من الأفران

moda 707
العيش الفينو القطني البيتي أفضل من الأفران
واتساب ماسنجر تلجرام

العيش الفينو القطنى 🥖مقدم من شيف / هدير علام 

اللى هيجرب الطريقه دى للفينو والكيزر مش هيشترى من بره تانى وكمااان بنفس العجينه ممكن نعمل التوست الطرى جداااا زى بتاع بره بالظبط

بكيلو واحد دقيق عملنا تقريبا ١٨ رغيف وقالب توست


المقادير :

كيلو دقيق/ ربع كوب زيت نباتي/ معلقتين كبار سكر / ربع معلقه صغيره ملح/ معلقه صغيره بيكينج بودر / كيس خميره فوريه / علبه زبادى كبيره “١٧٠جرام” / لبن دافى للعجن.

الطريقة :

فى بوله هنحط الدقيق والخميرة والسكر والبودر والملح ونقلب كله وننزل بالزيت والزبادى ونبدأ نعجن واحده واحده باللبن الدافى لحد مالعجينه تبدأ تلم بس تكون بتلزق نوقف اللبن “الكميه دى هتاخد من كوبين ل كوبين ونص لبن حسب نوع الدقيق “ونبدأ نعجن مده لاتقل عن ربع ساعه لحد ماناخد عجينه طريه جدا وناعمه “منزودش دقيق خااالص نعجن بس حلو العجينه هتظبط جداا ” نلمعها زيت من فوق وتحت ونحطها فى البوله ونغطيها ونسيبها تخمر لحد ماحجمها يضاعف ” هحطلكو شكلها فى الكومنتات ” بعد كده هناخد تلت العجينه نبططها بأيدينا دائره متكونش رفيعه اوى ونلفها رول وندهن قالب التوست زبده ونحط الرول ونساويه بأيدينا على اد الصينيه وندهن وشه زبده طريه ونسيبه يخمر تانى لحد ماحجمه يضاعف” وناخد بالنا القالب يكون مناسب بحيث يكون رول العجينه واخد ربعه فقط قبل مايخمر.

هنيجى لباقى العجينه ناخد جزء نعملها كور صغيره بحجم البرتقاله الصغيره ونرصها على صينيه مرشوشه دقيق ونضغط بسيط ع الكور بعد مانرصها “ده هيبقى الكيزر” وباقى العجينه هنعمله كور متساويه وناخد كل كوره نفردها بأيدينا دائره ونعملها رول ونقفل الأطراف ونرصها على صينيه مرشوشه دقيق وده هيكون الفينو … نسيب كله يخمر تانى لحد مايضاعف حجمه بعد كده ندهن الوش ” ربع كوب لبن مدوب فيه معلقه صغيره سكر ومعلقه صغيره نسكافيه بلاك” ونرش سمسم وحبه البركه براحتنا ومننساش ندهن وش التوست برده وندخل بقى فرن سخن على ١٨٠ لحد مايستوى وياخد لون جميل للوش نطلعه نغطيه بفوطه ناشفه نضيفه خمس دقايق ودوقوا بقى احلى فينو وتوست طرى وهش جدا.


اهم حاجه زى ماقولنا العجن كويس جدااااا / والتخمير مره قبل التشكيل ومره تانيه بعد التشكيل وأنه يتغطى بعد ميطلع وبالهنا والشفا

اترك تعليقا

لن يتم نشر عنوان بريدك الإلكتروني.