الكابتن أحمد حسن فى ضيافة” مريم ” الأولي علي الثانوية العامة وأسرتها ويسجل تقديره واعتزازه بهم

كتبت : منال محمد الغراز 

“رصــــد الـــوطـــن”

قام الكابتن “أحمد حسن ” نجم كرة القدم اللامع والمعلق والمحلل الرياضي بزيارة لمريم الأولي علي الثانوية العامة وقد أبدي سعادته واعتزازه بهذه الزيارة في كلمات سطرها علي صفحته الشخصية جاء فيها ..
” يوم مع الدكتورة مريم وعائلتها
حابب اتكلم عن نموذج مشرف ومحترم وهقول اللي انا حاسه وهتكلم من قلبي شوفت الصديق سامي عبد الراضي اول ما نزل قصة مريم ونجاحها في الثانوية بنسبة 99% وهي بنت حارس عقار بسيط
ولكنه كبير مقاما وعفيف النفس اتصلت مباشرة علي سامي وقولتله عايز ازور مريم وأبوها ، وشوفت اد اية مريم فخورة بأبوها وأمها واهلها كلهم ، وهم دول فعلا اللي يتقال عليهم ولاد الناس مش زي ما المجتمع المريض بيصور الناس دايما بالمظاهر الكدابة هما ولاد مين وللا لابسين اية وللا راكبين اية ، وده للاسف اصبح حال مجتمعنا الردئ ،
بس ولاد الناس الحقيقيين هما اللي عرفوا يربوا ولادهم ، ولاد الناس هما اللي بيحافظوا علي قيمهم ومبادئهم وأهاليهم ، ولاد الناس عمرها ما كانت بالمظاهر الكدابة
وبما اني ده مجتمعنا واصبحت دي نظرة المجتمع
فنفس الشئ ينطبق علي اعلام اعمى عن رؤية النمادج المشرفة
تفتكروا حد النهاردة هيجري ورا مريم ويدفعلها فلوس عشان يستضيفها ويطلعها كنمودج مشرف فهي بنت حارس العقار البسيط وعندها اربع اخوات وفي غرفة واحدة قدرت تتحدى كل الصعوبات دي وتجيب 99%
اكيد محدش هيعمل كدة عشان اصبحنا في زمن التفاهات والهلس ، نموذج زي مريم اكيد ما يجروش وراه ، لكن طبعا يجروا ورا نماذج التعري التانية ، اللي كل ما تتعرى اكتر يدفع لها اكتر ، فتتعرى اكتر فيدفعلها تاني اكتر.
وللاسف هو ده بقى حال مجتمعنا واعلامنا
طب ما انا عندي فكرة ما نقدم نموذج زي مريم
ويبقى عندنا نموذجين نموذج للتعري ونموذج محترم تحدى كل الصعاب ونسيب الناس هي اللي تختار
ومش كدة وبس دا المفروض انهم يجروا علي مريم ويدفعولها بالدولار وهي اللي تتنك عليهم لان مريم هو النموذج المفترض اللي نقدمه لولادنا ومجتمعنا علشان ننشئ مجتمع سوي مش نقدم النماذج الهلس
مبسوط جدا النهاردة ان انا زرت العيلة دي وانا فخور ببنت زي دي وبعيلتها.
ليا صور كتير بعتز بيها وبكون فخور بيها ولكن الصورة دي هحتفظ واتشرف بيها
وكمان هكتب تحتها شكرا لمريم انها اتصورت معايا عشان والله ومن قلبي انا كنت اتمنى ان نموذج مريم ده تكون اختي او بنتي ، باصرارها وعزيمتها وطبعا ادبها واخلاقها وتربيتها عشان كنت هطلع واقول دي اللي شرفتني
اكيد في مئات زي مريم ، محتاجين حد يظهر النماذج دي عشان نعلم ولادنا معنى النموذج المحترم
شكرا للدكتورة مريم ، وشكرا للحاج سعيد الراجل المحترم … وهما دول الناس الحقيقين وهما دول ولاد الناس الحقيقين “