نداء عاجل واستغاثه بالساده المسئولين عن عين شمس (دم فرحة…في رقبة مين) (حق فرحة..عند مين؟)

كتبت / شرين نجيب

“رصـــــد الــــوطــن”

نداء عاجل واستغاثه بالساده المسئولين عن عين شمس
(دم فرحة…في رقبة مين) (حق فرحة..عند مين؟)
واخص بالنداء كلا من /
السيد النائب /يسرى الاسيوطى
السيد النائب /ثروت بخيت
السيد النائب / محمد الكومى
السيد / مأمور قسم عين شمس
السيد / رئيس حى عين شمس
ايها الساده المسئولين عن اهالى عين شمس ومنوطين بحمايه اهالى عين شمس سواء من اختارهم الشعب (الساده النواب)
او الساده المعنين من قبل السلطات النفيذيه فى الدوله( مامور قسم عين شمس) و(السيد رئيس الحى)
هناك اب مكلوم يستغيث بكم ان تساعدوه فى الحصول على حقه المهضوم ودم ابنته المهدور
الحكايه بكل تفاصيلها سارويها على حضراتكم وبتأسف على طول المقال لان الموضوع جد خطير
انه فى يوم الجمعه الموافق 2016/12/30 الساعه التاسعه صباحا
كانت الطالبه( فرحه سيد )والبالغه من العمر (15)عام متوجه الى درسها الخصوصى وهى ماره من امام العقار رقم (58) بشارع عين شمس (امام شارع ابراهيم عبد الرازق مباشره)
والمملوك لرجل الاعمال / (مجدى العسال وشركاه )
ويشرف على البناء المهندسه / (غاده سويلم الديب )
وقع على الفتاه /( فرحه سيد ) طورناته حديد تسليح تخص المبنى المذكور مما اددى الى وفاتها فى الحال
تفاصيل الحادث
===========
عربيه تلات ارباع نقل بتنزل الحديد امام العماره بطريقه بدائيه شديده الخطوره وهى ان السائق يصعد بالعربه من جانب واحد على حجر كبير امام العماره مما يؤدى الى ميل شديد فى السياره مما يؤدى الى انزلاق الحديد على الارض
السائق بينزل الحديد فى اتجاه الشارع الرئيسى وليس بجانب العماره اثناء مرور الفتاه البريئه فا الحديد انزلق بشده مما جعل البنت تتخبط فى جزء من الحديد ووقع عليها الجزء الاخر مما ادى الى وفاتها فورا
قام بعض اهالى المنطقه بنقل البنت الى مستشفى هيليوبليس التى التى فارقت الحياه بالفعل امام ابواب المستشفى ولم تنجح كل محاولات الاسعاف التى قامت بها المستشفى
تم عمل محضر بالواقعه وخرج السائق بضمان محل اقامته كالعاده
واستلم الاب الكلوم جثمان ابنته وتحفظ الاهالى على السياره وقامو بتفريغ الهواء من الكاوتش بتاع العربيه
ابو البنت راجل كهربائى على باب الله يعمل باليوميه وساكن فى اوضه وصاله بالايجار الجديد
وللحقيقه حضر السيد مالك العماره رجل الاعمال (مجدى العسال) مراسم الدفن والعزاء وواسى والد البنت ببضع جمل لا تثمن ولا تغنى من جوع من نوعيه
(اللى انت عايزه انا هملهولك وانا تحت امرك فى اى شىء وهيا ماتت الله يرحمها وده عمرها )
والكلام اللى ولا بيودى ولا يجيب
واثناء العزاء وانشغال اهالى الحى بالعزاء قام رجل الاعمال عن طريق رجاله بسحب السياره وسحب الحديد من الشارع و بعد العزاء بيومين جاء رجل الاعمال ومعاه ناس من اهل الخير فى عين شمس علشان يقعدو مع الراجل ويحلو المشكله بطريقه وديه فى الاول عرضو على الراجل مبلغ 50 الف جنيه الراجل رفض وقال انا مش ببيع دم بنتى انا عايز حقى بالقانون فا رفع السيد رجل الاعمال المبلغ الى 75 الف جنيه ثمنا لدم البنت ورفض الرجل ايضا
كل ده ولسه مافيش مشكله
المخالفات عديده ايها الساده ومنها
1/ السائق يحمل رخصه درجه ثالثه مهنيه وده مخالف لقانون المفروض سائق النقل يحوذ رخصه درجه اولى
2/المبنى بدون اى تحذيرات امنيه او اشارت ضوئيه او سياج امنى مخالفه لقانون البناء المصرى
3/ مواد البناء المفروض تشون داخل العقار المراد بنائه وليس فى الشارع الرئيسى
4/ وده الاهم ازى الارض اصلا تتبنى وهيا متاخمه لارض الاثار ولم يتم الانتهاء من التنقيب والتفتيش بعد مين اللى اداهم قرار الهدم والبناء مين اللى سمح ليهم انهم يبنو عليها وهيا ارض مليانه اثار
هما ولاد مين فى مصر وايه سلطتهم
وطبعا البشوات بيشتغلويوم الجمعه بس وكل اجهزه الدوله اجازه
المشكله بقى فى القانون وتطبيقه فى بلدنا
اولا الراجل عمل محضر باللى حصل وفى ناس شافت الحادث عملت محضر اضافه اقوال فى النيابه والنيابه مشكوره اصدرت اوامرها وتوصياتها كالاتى /
اولا / وقف رخصه البناء لمخالفه شروط الامن الصناعى ومخالفه قانون شروط البناء
ثانيا /وقف اعمال البناء لحين النظر فى القضيه محل الدعوى
ثالثا /انذار الى السيد مامور قسم عين شمس لوقف البناء وتنفيذ تعليمات النيابه
رابعا /انذار الى السيد رئيس الحى للمتابعه وتنفيذ توصيات النيابه
وارقاام المحاضر هى
ومحضر اثبات حاله وخطاب تم تسليمه فى مكتب رئيس الحى
رقمه 99 /
2017/1/17
محضر فى النيابه
10200
ادارى عين شمس لسنه 2016 وتم ارساله للقسم للقيد برقم جنحه
تم عمل محضر اخر فى قسم عين شمس لاثبات المخالفات واستمرار اعمال البناء برقم
565/2017 ادارى عين شمس
كل ده والشغل شغال زى ما هو كل ده ومازالت اعمال البناء كما هى
وكان شيا لم يكن وكأن من ماتت قطه او كلب ضال
مع كل ذلك فا البناء مستمر دون ادنى رادع
ودون ادنى امان صناعى او وسائل تنبيه للماره
لازلت كتل الحديد تلقى فى الشارع
لازالت الرمله والزلط والخلاطات تمرح فى شارع عين شمس الرئيسى
وكل يوم الراجل الغلبان يروح الحى ومن الحى الى القسم ولا حياه لمن تنادى
20 يوم مروا على الراجل دون فائده هما ولاد مين فى مصر علشان يعملو كده هما ولاد مين فى مصر علشان يقتلو القتيل ويمشو فى جنازته هما ولاد مين فى مصر علشان يحطو سعر للدم المراق على الارض هما ولاد مين فى مصر علشان يقتلو فرحه اب ببنته وهى تبلغ عمر الزهور ولا يرمش لهم جفن
هما ولاد مين فى مصر علشان يقتلو الناس ولا يشغلهم شىء ولا لهم رادع
وهذا نداء إلى شرفاء هذا الوطن
الى الساده المسئولين المهتمين بالإنسان والعدل والقانون
هناك همسات تدور بأن هناك مقاول من ضمن مقاولين حى عين شمس شريك معاهم فى العماره اسمه رومانى
الرخصه توقفت والبناء شغال
اليس من حقنا ان نمشى فى الشوارع بامان
اليس من حقنا ان لا نقلق على اولادنا اثناء سيرهم فى الشوارع
ايها الساده الافاضل
فى ظل هذا العهد الذى يتساقط فيه الفاسدين واحدا تلو الاخر
طمعنا فى ضمائركم كبير عشمنا فى انسانيتكم كبير كلكم اباء لاطفال فى عمر الزهور ارجو ان تعتبروا فرحه بنت من ابنائكم وتهتموا بوالدها المكلوم
ايها الساده الافاضل
دم فرحه فى رقبه مين
حق فرحه عند مين