وصفة دجاج كنتاكي

دجاج كنتاااكى مقدمه من شيف / هدير علام
ومخدناش سر الخلطه من عمو كنتاكى ولا حاجه
انا بس جربت كتيررر لحد ماطلعت بأقرب طعم وشكل
يلاااا بينا ع التفاصيل
الطريقه سهله جدا . بس هى مجرد تركاات هناخد بالنا منها
ولكل اللى بيسأل هى مستويه حلو ولالا ؟ ااه مستويه حلو جداا لحد العضم 😊💪
اولا الفرخه لازم تكون مش كبيره يعنى من وزن ١٢٠٠ ل ١٥٠٠ جرااااام وده اقصى حاجه علشان تستوى كويس
ثانيا هنقطع الفرخه على ٨ ولاااازم ٨ مش ٤ علشان برده تستوى كوويس
ثالثا بعد ماقطنا الفرخه ٨ وغسلناها حلو جدا زى محنا متعودين ⁦⁦✌️⁩هنمسك كل قطعه من الفراخ وبالسكينه هنعمل فيها تشريحات بسيطه وده هيخلى الطعم يوصل لحد كل قطعه لحم جوه الفرخه وكمان هيساعد جداا فى التسويه
لحد كده تمااام
لمقادير الفرخه الواحده
علبه زبادى وكوبايتين لبن ومعلقه كبيره كارى ومعلقه كبيره توم بودره ومعلقه صغيره فلفل اسود ومعلقه صغيره ملح ونص معلقه صغيره سكر وعصيييير ليمونتين
نحط كل ده فى بوله ونضرب حلو جدا بشوكه او مضرب يدوى لحد مايبقاش فى اى كلاكيع وننزل بالفراخ بتاعتنا نقلب حلو جدا ونغطيها وع التلاجه نبيتها ليله ” يعنى نجهزها من انهارده علشان نعملها بكره “
تانى يوم هنجيب ٣ اكواب دقيق وكوب الاربع نشا ومعلقه كبيره لكل من ” بابريكا . بصل بودر . توم بودر. كارى “
ومعلقه صغيره لكل من ” فلفل اسود . جنزبيل بودره . زعتر كسبره ناشفه. ملح” وربع معلقه صغيره شطه ناشفه ….نقلب بقى ده كله حلو اووى فى بوله واسعه
ونجيب بوله تانيه برده غويطه نملا نصها ميه عاديه من الحنفيه أو الفلتر عادى المهم انها فى درجه حراره المطبخ لاساقعه ولاسخنه
كده بقى عندنا ٣ بولات
واحده فيها الفراخ المتبله من امبارح
وبوله فيها خلطه الدقيق والنشا
وبوله فيها ميه
ناخد بقى قطعه قطعه من الفراخ نحطها فى خلطه الدقيق وندلكها حلو جدا وندخل الدقيق فى كل حته وجوه التشريحات اللى عملناها . غلفناها كويس جدا ودلكناها لمده متقلش عن نص دقيقه ناخدها ع البوله اللى فيها الميه ننزلها فى الميه ونسبها بالظبط ٣ ثوانى ونشيل على خلطه الدقيق تانى ونكرر التدليك والتغليف الكويس جدااا وناخدها تانى للميه ٣ ثوانى ونرجعها لخلطه الدقيق نغلف حلو جدا وندلك وناخدها على زيت غزير سخن على نار متوسطه لاهاديه اوى ولا عاليه ونكرر نفس الكلام فى باقى قطع الفراخ وشوفووو النتيجه الرهيييييبه اللى بجد هتتبسطوووو اوى اوى
الموضوع سهل وبسيط بيحتاج بس روتين معين كده علشان تطلع مظبووووطه جدااا 💪😉
كميه خلطه الدقيق دى تكفى فرخه . لو هتعملو اكتر ضاعفو الكميات المذكوره كلها
وبالنسبه للبطاطس احنا عملناها قبل كده سوا
بنجيب بطاطس حلوه للتحمير نقشرها ونخرطها وسط لا سميك ولا رفيع وبنقطعها بالطول مش بالعرض علشان تبقى شبه اللى بره . نغسلها ونصفيها وننزل بيها على زيت سخن غزير تاخد نص تحميره ” لحد ماتبدأ تمسك نفسها كده بس لسه بيضا” نشيلها على طول نصفيها على منديل مطبخ وتبرد تماما نكيسها وع الفريزر نسحب منها زى منحب جاهزه ع التحمير ولو هنعملها فى يومها نعينها فى الفريزر نص مقليه ع الاقل ساعه وتطلع على زيت غزير تاخد لون وقرمشه وبقى عندنا احلى فارم زى الجاهز تماما
وبالف هنا وشفا