اخر خروجة

كتبت :جيهان بركات

طارت فرحا عندما اتصل بها زوجها وطلب منها ان تترك الاولاد عند الجيران وتجهز سوف يمر عليها ليأخذها تخرج معه … تأهبت فى اجمل زينة وارتدت ابهى فستان لديها اشترته من فترة ولم ترتديه وكأنها تدخره لمناسبة حلوة … وجاء الزوج واسرعت اليه وكلها لهجة وحيوية واعجب بمظهرها وبعد برهة
قال لها … اول مرة اخد بالى اد ايه انتى حلوة ..
خجلت من الاطراء الذى لم تسمعه من سنين واكتفت بابتسامة ارتسمت على وجهها الخجول الذى تشرب بالحمرة من الخجل واهدلت اهدابها ونظرت لاسفل فازدادت جمالا على جمالها …
وشرد بذهنه طوال الطريق لم يبوح بكلمة .. ووصلا المكان .. انبهرت بجمالها واضواءه … الله المكان جميل اوى ميرسي انك جبتنى هنا احنا بقي لنا سنين ماخرجناش سوا بس اول مرة نخرج نيجى المكان ده تحفة بجد انا مبسوطة اوى …
هذه الكلمات العفوية البسيطة ألجمت لسانه وظل ساكنا لحظات … وكأنه يشحن نفسه ويحفزها للحديث …
نظرت اليه نظرة حنونة لتشجعيه على الحوار..
فقال لها … انا فيه موضوع لازم اتكلم معاكى فيه بقي لى فترة ومش عارف أبدأ ازاى
امسكت يده برقة واطمأنته ان يتكلم …
بصراحة انا اتجوزت من شهور … وننظر اليها وهو متحفز ان تثور وتصرخ او تنهار وتبكى ولكنها لم تتنازل عن ابتسامتها وسكنت دقائق مرت ثقيلة ….. على نفسه وليست على نفسها … نصف ساعة وهى تنظر اليه ولاتتكلم وهو ينتظر رد فعلها وصمتها اربكه ..
شوفى الحياة هتستمر زى ماهى وهاقسم الوقت والفلوس بينكم يعنى هى 3 ايام وانتى 3 ايام ومصروف البيت بالنص .. واعملى حسابك لما اكون معاها مفيش اتصال مهما حصل وهى. نفس الشئ لما اكون عندك ماتتصلش ..
واوعدك انى هاعدل بينكم …..
ضحكت ضحكة لم يفهم منها اتسخر او جنون … وردت ببرود ماانا عارفة انك اتجوزت
فاخرجت من حقيبتها ظرف كبير واخرجت منه صورة وقالت له .. دى صورتك مع الحلوة فى الغردقة لما قلت لى انك فى مأمورية فى سوهاج وانا عمرى مارحت الغردقة
ودى صورتك وانت فى الساحل لما قلت لى انك مسافر قنا فى شغل … واحنا بنتحايل عليك كل سنة نروح المصيف ودى صورتك وانت فى الجونة الا فين الجونة دى وقلت لى وقتها مامتك عاوزة تروح البلد
ودى صورتك وانت اسوان وقلت لى انك فى السودان .
نظر للصور وظهرت على وجههة علامات شك وغضب ..
قبل ماتتهمنى انى باتجسس عليك دى صاحبتك الحلوة كانت بتبعتها لى على الفيسبوك وكل مرة تكتب لى كلام يولعنى ويقيد نار فى قلبي .. وفى الاخر لما نهرتها تبعد عنى بعتت لى صورة الزفاف كنت قمر بس طولت اوى فى الصحوبية والخطوبة ياراجل عيب عليك بهدلتها خروج وفسح وسفريات …
انتى اتجننتى انتى بتقولى ايه .. انتى
انت تسكت خالص افتكرتك محترم وعاقل ورشيد جاى تبلغنى بان لى 3 ايام ونص مصروف البيت … ياسلام على اساس انى هاقبل الوضع ده سنة كاملة مصاحبها وانت متصور انى مش حاسة وشايفة عذبتنى سنة كاملة وانت بتحب وتعشق وانا باخدم واطبطب
واحلى حتجة اوعدك انى هاعدل اى عدل ده والحلوة اتفسحت فى اماكن عمرى ماشفتها فى الصور اى عدل وانا زوجة 15 سنة وام ل 3 اطفال ولينا 3 ايام وهى 3 ايام وكمان نص مصروف البيت الله الله عليك فين العدل ده شاور عليه فى اى جزء …. انبسط ياحبيبي مع الحلوة بشرها بقي انك هتكون لها وحدها الاسبوع كله والشهر كله وباقي عمرك
مبروك عليك يازوجى العزيز يااللى راعيت عشرة العمر .. لو كنت احترمتنى كزوجة شافت معاك الحلوة والمرة وصارحتنى يمكن كان ربنا رضانى ورضاك واحترمت فيك مشاعرك .. واقول اه من حقك تحب وتعيش قصة حب وانى فاشلة … بس انا مش فاشلة .. الحمدلله انا مؤدبة مش قادرة انطق انت فى نظرى ايه … مبروك
انا رفعت عليك قضية خلع … وابتسامتى دى اخر حاجة هتشوفنى بها عشان مش،هتشوفنى تانى