خبز الحليب بطعم شهي أصنعيه بنفسك بمنزلك

خبز الحليب 🥯 مقدم من / شيف هدير علام

لما الدقيق يدلع مع الزبده والحليب والبيض والفانيليا والزبده ويترصوا ويتغرقوا بخلطه الحليب ويدخلوا الفرن اكيد النتيجه هاتبقى خيال  اللى هيجرب الخبز ده مش هيبطل يعمله الحقيقه من جماله .. حاجه كده مابين الدونات والفطائر مسكره وطعمها بيدووب . والخلطه اللى سقيناه بيها خلى الخبز طالع شارب كريم كراميل

المقادير /

نص ك دقيق “٤ اكواب” وهنخلى نص كوبايه جنبنا احتياطى

بيضه / كوبايه حليب دافى/ معلقه كبيره خميره فوريه + معلقه كبيره سكر

ربع كوب زبده طريه + ربع كوب سكر+ معلقه صغيره فانيليا سائله + معلقه كبيره بيكينج بودر

الطريقة :

فى بوله هنحط الحليب الدافى ومعلقه الخميره ومعلقه السكر ونقلب ونغطى ١٠ دقائق يخمروا وبعد كده هنضيف البيضه والفانيليا وباقى كميه السكر نقلب كويس وننزل بأربع كوبايات دقيق والبودر ونبدأ نعجن ونلم العجينه.. اول ماتبدا تلم هنزود الزبده الطريه مش سائله ومش جامده ونفضل نعجن لانها بتاخد وقت فى انها تلم وده هيكون سر الهششان والطراوه بعد التسويه … هتاخد عجن ربع ساعه احنا عاوزينها طريه جدا وناعمه وشبه ملزقه بس بتفك من الايد .. ونص كوبايه الدقيق الاحتياطى اللى جنبنا دى علشان لو احتاجناها لأن كل نوع دقيق بيختلف عن التانى بس متستعجلوش فى انكوا تضيفوه لأن العجينه كل ماتتعجن كل ماهتلم وتبقى مظبوطه 👌

نغطيها ونسيبها تخمر لحد ماحجمها يضاعف بعد كده هنقطعها كور متساويه ونمسك كل كوره نكورها حلو ونجيب صينيه مدهونه زيت او عليها ورق زبده ونرص الكور فيها ونسيب مسافه بسيطه لأن عاوزنها تمسك فى بعض بعد التخمير والتسويه .. وعاوزين الصينيه يكون ليها جوانب مش مسطحه ..نغطيها نسيبها تخمر تانى لحد ماحجمها يضاعف وفى المرحله دى هتلاقو الكور لزقت فى بعضها 👌 لحد كده فل اووى ممكن ندهن وشها وندخلها تستوى وهتطلع خبز حليب جميل جداا

بس انا مكتفتش بده …. عملت خليط وسقيت بيه كور العجين دى بعد التخمير خلت الطعم والنتيجه تجنن

طب ايه هو الخليط ؟ 👈👈 كوب لبن وبيضه ومعلقه صغيره فانيليا سائله ومعلقتين كبار سكر ومعلقتين كبار لبن بودره وبالشوكه خلطنا كله لحد ماتجانس ولونه بقى اصفر فاتح خالص والسائل اضاعف ممكن تعملوها فى الخلاط الخطوه دى

👌 اخدت الخليط ده وسقيت بيه كور العجين اللى لزقت فى بعضها بعد التخمير ودخلت فرن سخن على ١٨٠ لحد ماستوت ووشها اتحمر من غير مافتح الشوايه… واخدت من الخليط اللى ساقيناه بيها اللى اخدته والباقى اتحول لكريم كراميل لزق فى كورات الخبز وأدى طعم روووعه بجد ووووهمى

اهم حاجه بعد مايستوى ويطلع غطوه بفوطه ناشفه نضيفه ٥ دقائق وحضروا الشاى واستمتعوا بأحلى طعم ممكن تدوقوه