فضفضه رضوى إبراهيم …الست بتحب الراجل اللى بيهتم بتفاصيلها حتى لو كانت تفاصيل صغيره

مقدرش اقولك غير كل طريقة حبك ليا
او غير عليا ولا فاجئني في مرة وهاتلي هدية
واملى عنيا واعمل حاجة انا مش عارفاها

مقدرش اقولك حلي الدنيا فعيني وغير فيا
لو مهما كنت قريب مني وكنت قريب ليا
مقدرش اقولك شكل حياتنا اللي انا عايزاها
الأغنية دي لخصت كل حاجه لكن علشان كلام أغاني متاخدش بجديه
رغم أن الدراما والأغاني جزء لا يتجزء من حياتنا
ما علينا
الستات في حاجات صغيره أوى بتفرق معاهم ممكن أنت كراجل مش واخد بالك منها ولو عملتها مش هضيعلك وقتك بالعكس دي هتريح دماغك من وجع القلب والنكد والخناق :
☆ فجاءها بشكولاته حتى لو من أم جنيه
☆خاف عليها كأنها بنتك الستات بيأكل معاهم الكلام دا أوي
☆لو ماشى معاها في الشارع قولها تعالى امشى بعيد عن العربيات هتحس أحساس حلو وانت مبذلتش مجهود
☆مش فاضى ووراك شغل ابعتلها رساله قولها بحبك ونفسي اكلمك ورغم أنى مشغول حسيت أني لازم أقولك بحبك مهما كان ورايا
☆متعليش صوتك عمال على بطال
☆أسمعها
☆عكسها حتى لو كنت متجوزها من 30 سنه الست ست صدقني
☆متخوفهاش من رد فعلك علشان تحكيلك
☆لو بتزعل من اتصالاتها الكتير اول لما تتصل كنسل عليها وقولها حبيبي معلش مش عارف ارد عليكي دلوقتي بحبك
☆تحسسها أنها ماليه عينك وقلبك
☆بلاش تتريق عليها وعلى شكلها
☆بلاش تمدح ست تانيه وتجرح مشاعرها
☆اسالها اكلتي
☆اسالها عن يومها
☆اضحك فى وشها
☆حافظ ديما على خط الراجعة معاها
☆قولها انتي حلوه النهارده حتى لو مجامله
☆لو عملت أكل طعمه مش حلو وجها بأسلوب كويس بلاش تكسر خاطرها وتقولها الأكل طعمه يقرف
حط نفسك مكانها هترحمها
دا كفاية:
☆وجع الدوره الشهريه ونفسيتها اللى بتبقى تعبانه والألم اللى بتحس بيه
☆كفايه الحمل والرضاعه
☆المذاكرة والترتيب
وخلى بالك الست مش بتعجز الست بتنطفى لو ملقتكش سند ليها وبتسعد قلبها وعينها
صدقني الحاجات دي بتفرق مع الستات أوى