قنوات الاتصال بين الحقيقه والخيال

كتبت : سماح أحمد

“رصــــد الــــوطــن”

في أي كيان أو دولة أو مشروع أو شركة في حاجة اسمها قنوات اتصال , وفي دراسة أثبتت إن 90% من نجاح أي مؤسسة لقنوات الاتصال وبس على سبيل المثال في وقت الحرب ، دور ضابط الاشارة أو الاتصال بيكون أهم من أي دور تاني لأنه حلقة الوصل بين الجيش على الأرض والقيادة في غرفة العمليات , وقوة أي جيش بتكون في قوة قنوات الاتصال دي وتأمينها وحجبها عن العدو , والتاريخ مليان أمثلة وقصص عن معارك كبرى انتهت لأن قناة الاتصال دي اتقطعت أو تم اختراقها من العدو ,  وفي وقت السلم نفس الموضوع ,  قوة أي مجتمع بتكون في قوة قنوات الاتصال دي , اللي هي في حالتنا دي الاعلام!

الاعلام هو اللي عندي وعندك وعند قيادة الدولة وعند العدو , وعلشان كده الدول اللي عندها قنوات اتصال وطنية بيكون صعب تسقط قدام أعدائها ,  عبد الناصر مثلا كانت عنده القنوات دي ولم يسقط رغم خسارة ثلث مساحة مصر في ستة أيام , هما بيقولوا ضحك على الناس , لكن الحقيقة هي إن قنوات الاتصال دي كانت أقوى من الضربة وقتها ,في المقابل مثلاً , أول حاجتين طلبتهم أمريكا في عهد مبارك كانوا تحرير الاعلام والاتصالات , وده نتج عنه قنوات اتصال ضعيفة وهشة ومشوشة , فكانت النتيجة مجتمع ضعيف وهش ومشوش , وسقط مبارك قدام شوية مظاهرات في ميدان التحرير! 

عندنا مجتمع مترهل , قنوات اتصال , في تشتت بين الناس , قنوات اتصال , في شكاوى من الأسعار , قنوات اتصال , مفيش اهتمام على حوادث الارهاب , قنوات اتصال , مفيش احساس بخطورة الوضع الاقليمي والمحلي , قنوات اتصال ,  الاعلام هو اللي بيعزف اللحن اللي كلنا بنرقص عليه , فلما تلاقي كل واحد بيرقص في اتجاه بعيد عن التاني , يبقى في عيب في اللحن أو إن الصوت مش واصل لكل الناس!

إعلام مصر حالياً هو السبب في تشتتها وفي أزمتها النفسية والعصبية والشعبية , في فشل اعلامي مش بس في التعاطي مع حادث جلل زي حادث الواحات النهاردة , بالعكس , الفشل الأكبر في فصل الناس عن الواقع الصعب اللي فيه المنطقة كلها ,  بس في نفس الوقت ارجع واقول الاعلام ده ممكن يكون سر نجاحها وقوتها وتفوقها , لو اشتغل صح واتسق مع أهداف مصر وأحلامها وطموحاتها , يا اعلام مصر , اتق الله في مصر ,