كيك البراونيز مقدم من شيف هدير علام

براونيز 🍫☕مقدم من شيف /هدير علام
اسهل واسرع حاجه حلوه نعملها وكمان شيك كده فى التقديم لو عندنا ضيوف

مكوناته بسيطه ومفهوش حاجه صعبه
مبدأيا البراونيز مابياخدش مواد رافعه يعنى لا بيكينج بودر ولا بيكينج صودا ومبنضربش كتير أثناء خفق الخليط
المكونات لعمل صينيه صغيره وتقدروا تضاعفوا الكميه
يستحسن يكون قالب مستطيل علشان ناخد الشكل المتعارف عليه
كوب الا ربع دقيق .. ذره ملح
كوب الا ربع كاكاو خام
كوب الاربع زبده سائله “مش سخنه”
كوب الا ربع سكر
بيضتين .. فانيليا
هانشتغل بمضرب يدوى عادى فى بوله نحط الزبده والسكر ونقلب لحد بس مالسكر يدوب وننزل بالبيض الفانيليا ونخلط لحد مايمتزجوا وننزل بالدقيق والكاكاو وذره الملح ويفضل يكون الدقيق والكاكاو منخولين نقلب وهايكون معانا خليط سميك ده القوام الصح نجيب ورق زبده نديله تلميعه زبده ونحط فى القالب وننزل بالخليط نفرده بمعلقه كويس ونساويه وممكن اختيارى نحط شيكولاته مبشوره أو شوكليت شيبس وندخل فرن سخن على 180 لمده من 15 ل17 دقيقه . هنختبره بخله وعاوزين الخله يطلع فيها جزيئات من الخليط بس مش كتير هيكون كده النتيجه المظبوطه مش عاوزين الخله تطلع نضيفه تماما واحنا بنختبر البراونيز
بس كده يطلع نقطع ونقدم مع سكر بودر أو ايس كريم وصوص شيكولاته ❤️
ملمس البراونيز من بره متماسك ومن جوه طرى
طبعا الكاكاو هو البطل والطعم الرئيسى فلازم يكون نوع كويس
وعموما طعم الزبده مع الكاكاو بيخلى الطعم غنى جدااااا مع كل قطمه 😊 وبالهنا والشفا 🥰