الرئيسية خواطر ” كلام من القلب ” كفاية بقه شعارات

” كلام من القلب ” كفاية بقه شعارات

moda 1144
” كلام من القلب ” كفاية بقه شعارات
واتساب ماسنجر تلجرام
بقلم / نسرين نبيل
“رصـــد الـــوطــن”

كفاية بقه … شعارات
أنا أبني لما مات …. قلبي أتوجع وحدي
توهت كتير وسنين … علشان القي مين يقف جنبي ؟
هو السند ….. والضهر
كان حلمي لما أموت … هو اللي هايشيلني
أنعوا وقولوا كتير ….. كله ما له تأثير
حلمي خلاص …. أدفن
لما لاقيته …. في كفن
يطلعلي واحد ويقول بلادنا … ياما شافت محن
طب قوم يا عم …. من علي كرسيك
وأنزل مع أبني …. اللي أدفن
كرهت صوتكوا ….. والكلام
قلبي أتوجع …. من كتر آهاته
لو ترحموا …. تحسوا بسكاته
ماتوا فداكي كتير …. بس ماله تأثير
طول ما اللي ….. بيسرق بيسرق
واللي يغشوا …. وينهشوا في لحمنا
ودول يا بلدي ….. كتير
يا بلدي خدتي مني ….. أجمل حلم
خدتي حياتي … كلها
صحيح شهيد …. مبسوط في جنته
بس أنا هاروح ….. لمين
يا وحدتي …… في غربته
اوعوا تقولوا ….. فلوس
أنا أبني تمنه ….. كتير
أنا أبني اللي خلاكوا ….. عايشين
بس للأسف …. بلا تأثير
عمري ما هاحزن يوم …. لو شوفت موته بحق
نفسي أشوف في يوم …. يا بلدي فيكي الحق
لكن كتير عايشيين …. ماسكين مناصب بس
يموت جنود ضباط …. وأهالي تموت بعدهم
علي حزنك …… وحزنهم
واللي بيسرق ….. بيسرق
واللي بينهب …. بينهب
يا بلدي والله كتير ….. يروح عزيز غالي
علشان يعيش واطي …. مالوش غالي
طول ما القضا …. ساكت سنين عالحق
عمري ما هارتاح …. وهاتلاقوني أقول لأ
لأ للظلم ….. والظالمين
لأ للحكم …. والحاكمين
لأ للغربة …. وأنا جوه بلادي
لأ لموت أبني ….. وموت أحفادي
صحيح بحبك يا بلدي ….. والله حب ما له زي
بس نفسي أشوف فيكي ….. الأمل والضي
بقدم أبني صحيح ….. فداكي
بس اللي لازم … تعرفيه وتقدريه
إن الضنا غالي ….. يا بلدي
لازم تحافظي ….. علي الشباب
الشباب هما التراب …. هما السند والضهر
هما اللي بموتهم هايدوكي …. طول العمر
شباب ضحي بحياته …. علشان شعب يمسح آهاته
مش برده نبقي ….. في غلب السنين
ويموت عيالنا ….. واحنا تعبانين
وهما ياخدوا ….. حلمنا ويكرهونا في أرضنا
واحنا اللي دايما بنتحاسب ….. وبس
نفسي أسال هو ليه ؟ دايما الفقير اللي بيدفع كتير
والكبير في البلد ديه …. دايما كبير
شايل ولاده ومخبيهم ….. عننا
وكأنهم مش ….. مننا
وكأننا ما فيه غيرنا …. في أرضنا
ندفع فاتورة ….. وحدنا
بموت عيالنا …. في أرضنا
من غير حساب … وما حد حاسس بغلبنا
بس خلاص ….. راح اللي راح
أبني أدفن …. وأنا واقفة أصرخ في البراح .

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *