دوناتس بخطوات سهلة وبسيطة مع شيف دينا

متابعة /هبه سيد

وصفة محببة للكبير والصغير تقدمها لك شيف دينا بالخطوات المبسطة من جروب مفاجيع دوت كرش 

🌸المكونات🌸
• 4 كوب دقيق خاص بالمخبوزات او متعدد الاغراض..
• كوب وربع حليب دافئ..
• 3/4 كوب زبدة سائلة..
• معلقة كبيرة خميرة فورية..
• 4 معالق كبيرة سكر..
• 2 بيضة..
• فانيلا..
• رشة ملح..
• نصف معلقة صغيرة بيكنج صودا (كربوناتو) ولو مش متوفر ممكن يستبدل بمعلقة صغيرة بيكنج باودر ..
كده المكونات كلها جاهزة معانا..
اول حاجة بضيف السكر مع الخميرة والحليب في طبق عميق وأقلبهم كويس لحد ما يتجانسوا واغطيهم واسيب الخميرة تتفاعل وتعمل فوم عشان ابدا اشتغل فيها..
ممكن خمس دقايق او عشر دقايق..
..
في الوقت ده بكون خلطت كل المكونات الجافة مع بعض في وعاء خاص بالعجن وبعدين بضيف الخميرة بالحليب والبيض والفانيلا وأبداً اعجن وأثناء العجن بنزل بالزبدة المذابة تدريجيا ويفضل انها تكون دافية علشان تزود تفاعل الخميرة👍🏻
..
اعجن كويس جداً لحد ما العجين كله يلم معايا زي الكورة (مدة العجن لا تقل عن عشر دقايق او ربع ساعة)..
بكور العجينة وادهنها بالسمن المذاب او الزبدة واغطي الطبق كويس جداً ببلاستيك استريتش واسيبها ترتاح ساعة لحد ما تخمر وحجمها يتضاعف..
..
وياللا نشوف مع بعض خطوات الدوناتس..

هنا العجينة اول ما عجنتها.. لميتها على شكل كورة وحطيتها في الطبق وغطيتها ببلاستيك استريتش وغطيتها بفوطة وسبتها تختمر في مكان دافي لمدة ساعة..

بعد ما مر ساعة.. شيلت من عليها الفوطة والبلاستيك الاستريتش عشان اشتغل فيها

على رخامة او بلانشة فردتها بالنشابة بحيث ان سمكها ميقلش عّن 1 سم..

بقطاعة الدوناتس او باي قطاعة او كوب وغطاء زجاجة بنقطع الدوناتس..

بغطيها بفوطة واسيبها ترتاح عشر دقايق على ما الزيت يسخن..

في زيت غزير وسخن (على نار متوسطة) هنقلب الدوناتس مع التقليب باستمرار عشان متتحرقش لحد ما تاخد لون ذهبي غامق.. (انا استخدمت زيت دوار الشمس) افضل في القلي عشان كمان طعمها يبقى احلى..

بعد ما قليتهم وخلاص جاهزين للتزيين

استخدمت للتزيين جناش شيكولاتة وصوص كراميل وشيكولاتة بيضاء وسكر باودر..

هنا بالشيكولاتة البيضاء

هنا متغطيين بجناش الشيكولاتة وصوص الكراميل.. 

وهنا رشيت عليهم سكر باودر