الرئيسية أخبار طريقة عمل الميني بيتزا مع الشيف هدير علام

طريقة عمل الميني بيتزا مع الشيف هدير علام

moda 1539
طريقة عمل الميني بيتزا مع الشيف هدير علام
واتساب ماسنجر تلجرام

المينى بيتزا 🍕🍕 مقدمة من / شيف هدير علام
هنعملها سوا ونخزنها فى الفريزر ونسحب منها وقت منحب هتطلع كأنها لسه معموله حالا نقدمها فطار أو عشا وطبعاااا وصفه اساسيه معانا فى ملف تجهيزات المدارس واللانش بوكس ⁦هنقدمها بأى حشو نحبه ويعجب اسىرتنا واطفالنا ⁦
يلاااا بينا على التفاصيل ⁦
كيلو دقيق
٢كوب ونص لبن دافى
ربع معلقه صغيره ملح
معلقتين كبار سكر
كيس خميره فوريه”معلقتين”
معلقه كبيره توم بودره
نص كوب زيت نباتى
فى بوله هنحط الخميره والسكر نقلبهم وننزل باللبن الدافى “دافى يعنى مش سخن علشان ميموتش الخميره ومش ساقع علشان الخميره تشتغل حلو ⁦⁩” نقلب حلو جدا وننزل بكوبايتين فقط دقيق من كيلو الدقيق بتاعنا نقلب حلو لحد مالعجينه تتجانس وميبقاش فيها كلاكيع “واااه هتبقى عجينه سائله ” نلف البوله بكيس ونركنها تخمر عشر دقائق
طب ليه الخطوه دى ؟
اولاا بتضمنلنا نجاح تخمير العجينه علشان بعد التسويه ناخد العجينه المظبوطه
ثانيا بتسرع عمليه التخمير ⁦
بعد العشر دقائق تخمير هانجيب البوله ونزود عليها باقى المقادير “باقى الدقيق . الملح . الزيت . التوم البودر”⁦
ونبدأ بقى نعجن كتير لو عجانه مش اقل من عشر دقائق لو بالايد مش اقل من ١٤ دقيقه لحد ماناخد عجينه متماسكه طريه مبتلزقش فى الايد ⁦⁩ “سر نجاح اى مخبوزات فى ٣حاجات اولا العجين ثانيا التخمير ثالثا الفرن “⁦
نغطى البوله تانى ونركنها تخمر لحد ما تتضاعف ٣مراات تقريبا هتاخد ربع او تلت ساعه حسب درجه المكان اللى هتتخمر فيه ⁦
بعد ماتخمر هناخدها على سطح نضيف مرشوش دقيق نحطها ونرش فوقها حبه دقيق صغيرين وبالنشابه نفردها كلها لحد ماناخد سمك كويس لاتخين ولارفيع اوى تقريبا ارتفاع ١سم لأنها لسه هتخمر وتستوى فحجمها هيضاعف⁦
تماام فردناها كلها هنجيب بقى قطاعه دائره متوسطه ونبدأ نقطع دوائر من العجينه المفروده ونشيلها نحطها فى الصينيه اللى هنخبز فيها بعد مانرشها بدقيق “طيب مفيش قطاعه !! نشتغل بكوبايه مقلوبه هتدينا نفس نتيجه القطاعه ⁩”
بس كده باقى العجين اللى هيتبقى بعد التقطيع نلمه تانى ونفرده تانى وناخد منه الدوائر وهكذا لحد منخلص كل العجينه
نيجى بقى على الدوائر اللى رصناها فى صوانى الخبز ندهن وشها أما بصلصه البيتزا أو بخلطه حلوه اووى هى عباره عن كاتشب على صوص باربكيو نقلبهم حلو وندهن بيها وش الدوائر بتدى طعم جاامد
طيب لو حابين صلصه البيتزا فهى عباره عن “عصير ٣طماطمات متصفى . معلقتين صلصه جاهزه . فصين توم مهروسين . معلقه كبيره من ال٧بهارات. معلقه كبيره زعتر معلقتين زيت نباتى. رشه ملح بسيطه . ربع معلقه صغيره سكر .. بنجيب طاسه نحط عصير الطماطم يتسبك ننزل بالصلصه والتوم المهروس والزيت والسكر والملح والبهارات والزعتر نقلب فى السريع ونشيل ونخلى بالنا التوم نى مش بيتحمر ⁦”
بعد ماندهن وش الدوائر بالصلصه نحط بقى الحشو اللى نحبه “سوسيس . لحمه مفرومه. خضار . فراخ ” وع الوش حبه موتزاريلا أو اى نوع نحبه شيدر أو تركى
نسخن الفرن جدا وندخل على ١٨٠ لمده ربع ساعه تطلع نقدمها.. لو هنخزنها للمدرسه نسبها تبرد تماااااما ونجيب علبه محكمه الغلق نحط فيها كيس ونبدأ نرص المينى بيتزا وبعدين ع الوش كيس تانى ونقفل غطا العلبه وع الفريزر هتقعد معانا كتير.

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *