طريقة عمل تورتة بالمنزل بشكل احترافي

تورته بشكل احترافي تزيين بسيط زي المحلات تقديم شيف /سارة رجب

المقادير :

نص كيلو اسبونش بني او حسب الرغبه من اي عطار
نص كوب ميه عاديه بحراره الغرفه
6بيضات كبار بحرارة الغرفة

الطريقة…
ف طبق غويط نحط الدقيق عليه البيض عليه الميه و نضرب كله مع بعضه عشر دقايق لربع ساعة ع سرعه عاليه لما القوام يزيد و يتقل جدا… نصب الخليط ف قالب مقاس 26 تديكم 3 طبقات… تتخبز ف فرن 180… و نسيبها تبرد تماااااما.

نجهز الحشو… ٢ كوب كريمة شانتيه خام بدون سكر عليه ٢كوب ميه متلجة .. و نضرب كويس جدا بالمضرب لما تتقل معانا و نحط سكر بودره بالتدريج حسب درجة الحلاوه ال نحبها…

نقسم الكيك ويفضل يبات ليله و نرش ع اول طبقه كيك معلقه واحده كبيره من الشربات او العصير الخفيف زي التفاح او الأناناس وممكن سفن اب و نحط كريمه و تاني طبقه كيك و عليها معلقه شربات نوزعها و كريمه لما نخلص كل الطبقات واخر طبقه مبنحطش شربات فوقها عشان هنغلفها من بره نغلف بالكريمه… نسيح مكعبين شيكولا خام حوالي ١٠٠جم ع حمام مائي ونخففهم بمعلقتين او تلاته من الكريمه المضروبه ال حشينا بيها التورته ونقلب باستمرار هنلاقي بقى عندنا صوص شيكولا يجنن ننزل بيه ع الجناب و السطح ووردات بسيطه بالكريمه وزينتها بكرات من الشيكولاته المدوره.